Mədəniyyət və turizm işçilərinin toplantısı

26 iyul 2013-cü il tarixdə Heydər Əliyev  mərkəzində  mədəniyyət və turizm  işçilərinin toplantısı keçirilmişdir. Rayon İcra Hakimiyyətinin başçısı Mirdaməd Sadıqov tədbiri açaraq qeyd etdi ki, rayon mədəniyyət və turizm  şöbəsi  indiyədək nəinki beynəlxalq miqyaslı, heç Respublika miqyaslı bir tədbir keçirməyib. İsmayıllının qədim tarixi, etnoqrafiyası, xalq yaradıcılığı, xalq sənətkarlığı, etnik və milli zənginliyi ilə beynəlxalq folklorlar və xalq sənətkarlığı festivalı keçirməyə imkan verir. Festivala hazırlıq prosesində bir neçə mərhələdə xalq sənətkarlığı  nümunələrinin sərgi-satışı təşkil olunmalıdır.
Çox təəssüf ki, turistlərin sayının artması sənətkarlar maddi maraqlarını  peşələrini yaşatmaq  marağından üstün tuturlar. Hindistandan, İrandan  suvenirlər, mis məmulatları gətirirlər. Bunu yolverilməz hesab edirəm.
Mirdaməd müəllim daha sonra bildirdi ki,  mədəniyyət  və turizm  şöbəsində yaradıcılıq mühiti yoxdur, işçilərdə təşəbbüskarlığa, müasirliyə meyl azdır.         Milli-mənəvi dəyərlərin qorunması  və zənginləşdirilməsi sahəsində görülən işlər də qənaətbəxş deyildir. Bir vaxtlar çıxışları  hamını razı salan “Xalq teatrı” indi  yada belə salınmır. Mədəniyyət obyektləri mədəni-kütləvi tədbirlər  üçün  yararlı vəziyyətdə  deyildir. İxtisaslı kadrların azlığı da işdə keyfiyyətsizliyə gətirib çıxarır.
Rayon  mədəniyyət və turizm  şöbəsi hələ ki,  vəziyyətin əsaslı  surətdə yaxşılaşması üçün tədbirlər görülməsini ləngidir. Şöbənin müdiri A.Abbasov  rəhbərlik etdiyi  sahənin  fəaliyyəti barədə  məlumat  verdi. Bu məlumatdan aydın oldu ki,  mədəniyyət və turizm  sistemində  hələ də yaradıcılıq  mühiti  görünmür, inzibati mühit üstünlük təşkil edir.
Rayon İcra  hakimiyyəti başçısının ictimai-siyasi və humanitar məsələlər üzrə müavini Sevil Əhmədova  toplaşanlardan  işin yaxşılaşdırılması, folklor və xalq  sənətkarlığı beynəlxalq  festivalının  keçirilməsi ilə  əlaqədar təkliflər  istədi. Lahıcı təmsil edən  Nəzər Əliyev və Dadaş Əliyev daha səmərəli və düşünülmüş təkliflər verdilər.
Kürdmaşı  mədəniyyət evinin  direktoru Asvar Babayevin  təklifləri, çıxışı işə bələdlikdən irəli gəlirdi.
Yekunda qərara alındı ki, milli-mənəvi dəyərlərin qorunması, mədəniyyət və turizmin inkişafı, festivala hazırlıqla  əlaqədar konsepsiya  xarakterli  tədbirlər  hazırlansın  və onun  icrasını təmin etmək üçün təşkilat komitəsi yaradılsın.