İsmayıllını bizdən soruşun!
Əziz oxucular,
Son zamanlar İsmayıllı Rayon İcra Hakimiyyətinə istinad edilərək sosial şəbəkələrdə və internet resurslarında həqiqətə uyğun olmayan məlumatlar yayılır. Yayılan məlumatlara dərhal İcra Hakimiyyəti tərəfindən münasibət bildirilməsinə, təkzib edilməsinə baxmayaraq bu hal davam etməkdədir. Bu məqsədlə məlumatı yayan xəbər agentliklərinin rəhbərləri ilə əlaqə saxlanılmış, jurnalist etikasının gözlənilməsi, çaşdırıcı məlumatların yayılmaması xahiş edilmişdir.
Nüfuzlu xəbər portallarından bir neçəsi müraciətimizi qəbul edərək rayon haqqında hər hansı məlumatı bizimlə dəqiqləşdirdikdən sonra internet resurslarında yerləşdirirlər.
02 avqust 2013-cü il tarixdə www.modern.az saytında İsmayıllı Rayon İcra Hakimiyyətinə istinad edilərək yenidən həqiqətə uyğun olmayan “Prezident İsmayıllıya gedəcək” başlığı ilə məlumat yerləşdirilmişdir.
Bir daha müəllif Anar Rüstəmovla əlaqə saxlanılaraq jurnalist etikasına riayət edilməsi və İsmayıllı Rayon İcra Hakimiyyətinin adından məlumat yaymamaq xahiş edilmişdir.
Odur ki, İsmayıllı rayonu haqqında əldə etdiyiniz məlumatları bizdən dəqiqləşdirməyinizi xahiş edirik.
