İsmayıllıda “Yaşıl Market” Ticarət Mərkəzi açılıb

İsmayıllı şəhərində “İsgəndər ASA Holdinq Şirkətlər Qrupu” MMC-nin nəzdində yeni fəaliyyətə başlayan “Yaşıl Market” Ticarət Mərkəzi Prezident İlham Əliyevin rəhbərliyi ilə ölkəmizdə həyata keçirilən genişmiqyaslı islahatların, sahibkarlığın inkişafı üçün yaradılan əlverişli şəraitin bariz nümunəsidir. Ticarət mərkəzi 5 hektar ərazini əhatə edir. Ərazinin 3 hektarı kənd təsərrüfatı və sənaye mallarının satış bazarından ibarətdir. Burada, habelə tikinti materiallarının satış bazarı, avtomobillər üçün 2 dayanacaq, namaz otağı, 22 yerlik otel, 3 yeməkxana və ilkin tibbi xidmət otağı da var.
Sentyabrın 6-da İsmayıllıda Yaşıl Ticarət Mərkəzinin açılış mərasimi keçirilib.
Rayon icra hakimiyyətinin başçısı Mirdaməd Sadıqov ölkəmizin davamlı iqtisadi inkişafından söz açıb, yeni ticarət mərkəzində əhaliyə xidmətin yüksək səviyyədə təşkil olunduğunu söyləyib. O, ticarət mərkəzinin daim qonaq-qaralı olan İsmayıllıda küçə ticarətinin yığışmasına təsir göstərəcəyini qeyd edib.
Mərasimdə çıxış edən “İsgəndər ASA Holdinq Şirkətlər Qrupu” MMC-nin vitse-prezidenti Zərifə Quliyeva Yaşıl Ticarət Mərkəzinin əhaliyə yüksək səviyyədə xidmət göstərmək üçün yaradıldığını bildirib. Natiq bu gün Azərbaycanda Prezident İlham Əliyevin, birinci xanım Mehriban Əliyevanın rəhbərliyi ilə həyata keçirilən sosial layihələrdən, insanların həyat səviyyəsinin gündən-günə yüksəldilməsi istiqamətində görülən işlərdən danışıb. MMC-nin vitse-prezidenti minimum əmək haqqının, pensiyaların, dövlət qulluqçularının, dövlət büdcəsindən maliyyələşən digər kateqoriyadan olan işçilərin əmək haqlarının artırılmasının ölkəmizdə insana göstərilən qayğının nümunəsi olduğunu vurğulayıb.
Zenfira Quliyeva ticarət mərkəzində xidmətin yüksək səviyyədə təşkili edildiyini, insanların rahatlığı üçün lazımi tədbirlərin görüldüyünü diqqətə çatdıraraq vurğulayıb ki, yaşlı və xəstə insanlar mərkəzdə elektron xidmətdən yararlana biləcəklər. Belə ki, sifariş verdikləri məhsullar onlara evlərində çatdırılacaq, daşınma pulsuz həyata keçiriləcək. Ayrılan 3 avtobus vasitəsilə şəhərin müxtəlif istiqamətlərindən ticarət mərkəzinə gəliş-gediş pulsuz həyata keçiriləcək. Bazar günləri müxtəlif istiqamətlərdən kənd sakinləri də bu cür xidmətlərdən yararlana biləcəklər.
MMC-nin vitse-prezidenti bildirib ki, hazırda ticarət mərkəzində 400-dən çox işçi çalışır. Yaxın günlərdə daha 60 nəfərin də işə götürülməsi gözlənilir. Burada vətəndaşlara, eləcə də sahibkarlara kənd təsərrüfatı və tikinti sahələrində ucuz və keyfiyyətli xidmət üçün müxtəlif adda xeyli texnika cəmlənib. İlin bütün fəsillərində sifarişlər qəbul edilir.
Açılış mərasimində AMEA-nın şöbə müdiri, professor Rəna Mirzəzadə, Azərbaycan Qadın Sahibkarlar Assosiasiyasının sədri Səkinə Babayeva, Ekologiya və Təbii Sərvətlər Nazirliyinin sektor müdiri Mehman Nəbiyev çıxış edərək mərkəzin kollektivini, eləcə də rayon sakinlərini təbrik edib, Azərbaycanın davamlı inkişaf yolunda olduğunu, insanlara xidmətin səviyyəsinin gündən-günə yaxşılaşdığını vurğulayıblar.
Sonda musiqiçilərin ifasında rəngarəng konsert proqramı verilib.
Qeyd edək ki, “Yaşıl Market” Ticarət Mərkəzində kənd təsərrüfatı məhsulları digər ticarət obyektlərindən 30-40 faiz, ət məhsulları 10-20 faiz, geyim əşyaları 30 faiz, məktəb ləvazimatları isə 40 faiz ucuz satılır. İdarəetmədə satış qiymətlərinə, habelə sanitar-gigiyenik qaydalara ciddi nəzarət mexanizmi qurulub. Ət kəsmi sexləri və məhsulların saxlanılması qida təhlükəsizliyi qaydalarına tam uyğundur. Hazırda 70 tonluq soyuducu istifadədədir. Əlavə olaraq 2 min tonluq soyuducunun da qurulması nəzərdə tutulur.