Şanlı Qələbənin sevinci: İsmayıllı sakinləri vətənpərvər şüarlarla izdihamlı yürüş ediblər
Şanlı qələbə sevincini yaşayan İsmayıllı sakinləri bu gün gecədən etibarən əllərində Azərbaycan və qardaş Türkiyə bayraqları, dillərində vətənpərvər şüarlarla izdihamlı yürüş ediblər.
Rayon sakinləri küçələrə Prezident, Ali Baş Komandan İlham Əliyevin qələbə münasibətilə xalqa müraciətindən sonra axışıblar. Kütlə qarşısında mərkəzi meydanda, Şəhidlər xiyabanında çıxış edənlər Ermənistanın baş naziri Nikol Paşinyanın diz çökdüyündən, Prezident, Ali Baş Komandan İlham Əliyevin tələb etdiyi bütün şərtləri qəbul edərək məğlubiyyətlə barışmasından söz açıblar.
Yürüşə çıxan yüzlərlə avtomobil, minlərlə insan şəhərin mərkəzindən, ulu öndər Heydər Əliyevin abidəsi önündən başlayaraq Şəhidlər xiyabanına qədər gəliblər. “Yaşasın müzəffər Ali Baş Komandan!”, “Qarabağ bizimdir!”, “Yaşasın Şanlı Azərbaycan Ordusu!”, “Qarabağ Azərbaycandır!”, “Şəhidlər ölməz, Vətən bölünməz!”, “Şəhid qanı yerdə qalmadı!” kimi şüarlar səsləndiriblər.
