İsmayıllıda Vətən müharibəsinin qəhrəmanları ilə görüşlər davam edir

29 yanvar tarixində Rayon İcra Hakimiyyətinin başçısı Nahid Bağırov və millət vəkili Novruzəli Aslanov Vətən müharibəsində yaralanan döyüşçüləri evlərində ziyarət ediblər.

Pandemiya qaydalarına uyğun baş tutan görüşdən məmnun qalan qazilərimiz və ailə üzvləri göstərilən diqqət və qayğıya görə ilk növbədə Ali Baş Komandan İlham Əliyev və Birinci vitse-prezident Mehriban Əliyevaya minnətdarlıqlarını ifadə edərək bu ənənəni davam etdirən Rayon İcra Hakimiyyəti başçısına və rayonun Millət Vəkilinə təşəkkür ediblər.

Səmimi keçən görüşdə Azərbaycan ordusunun qəhrəman hərbi qulluqçuları keçdikləri şərəfli döyüş yolundan danışaraq öz təsüratlarını qürurla bölüşüblər.

RİH başçısı və Millət Vəkili qeyd ediblər ki, 44 günlük müharibədə tarix yazan rəşadətli ordumuz, qəhrəman əsgər və zabitlərimiz Azərbaycanın haqq mübarizəsində sarsılmazlığını, qələbə əzmini və yüksək döyüş məharətini bütün dünyaya nümayiş etdirdi. Vətən Müharibəsində İsmayıllıların qəhrəmanlıqlarından qürur duyduqlarını, bu qüruru yaşatdıqları üçün rayon ictimaiyyəti və öz adlarından onlara minnətdar olduqlarını bildirib, şəhidlərimizə allahdan rəhmət və qazilərimizə şəfa diləyiblər.

Qeyd edək ki, Azərbaycan Respublikasının Prezidenti cənab İlham Əliyevin müvafiq Fərmanı ilə şəhər, rayon icra hakimiyyəti başçılarının aparatlarında “Vətən müharibəsi iştirakçıları və şəhid ailələri ilə işin təşkili şöbəsi” yaradılmışdır. Ən qısa zamanda bu şöbənin əməkdaşları mütamadi olaraq müharibə iştirakçıları və şəhid ailələri tərəfindən qaldırılan məsələlərin həlli üçün zəruri tədbirlər görəcəklər.