“Şahin” hərbi-idman oyunları üzrə rayon birinciliyi keçirilib

12 aprel tarixində rayonun tam orta məktəblərinin şagirdləri arasında “Şahin” hərbi-idman oyunları üzrə rayon birinciliyi keçirilib. Tədbirin açılış mərhələsi  Əsasnaməyə uyğun olaraq Heydər Əliyev Mərkəzi qarşısındakı meydanda, digər mərhələsi  isə şəhər 3 nömrəli məktəb-liseyin bazasında keçirilib.

Tədbirdə RİH-nin müavini, aidiyyəti qurumların rəhbərləri, şəhid ailələri və ictimaiyyət nümayəndələri iştirak edib.

Azərbaycan Respublikasının Gənclər və İdman Nazirliyi, Müdafiə Nazirliyi,Təhsil Nazirliyi, Fövqəladə Hallar Nazirliyi, Mədəniyyət Nazirliyi, Səfərbərlik və Hərbi Xidmətə Çağırış üzrə Dövlət Xidməti və Azərbaycan Respublikasının Veteranlar Təşkilatının birgə təsdiqlədiyi Əsasnaməyə uyğun olaraq təşkil olunan birincilik gənc nəslin hərbi vətənpərvərlik ruhunda tərbiyəsi, şagirdlərin hərbi xidmətə hazırlıq səviyyəsinin yüksəldilməsi və yarışın zona mərhələsində iştirak edəcək komandanın müəyyənləşdirilməsi məqsədi daşıyıb.

İlk olaraq Azərbaycan Respublikasının Dövlət Himni səsləndirilib. Daha sonra Vətənin azadlığı və ərazi bütövlüyü uğrunda həlak olmuş şəhidlərin ruhu bir dəqiqəlik sükutla yad edilib. Tədbirdə çıxış edənlər “Şahin” hərbi-idman oyunlarının gənclərin orduya hazırlanmasında, onların vətənpərvərlik ruhunda tərbiyə olunmasında böyük əhəmiyyət kəsb etdiyini deyib, iştirakçılara uğurlar arzulayıblar.

Olduqca maraqlı və gərgin mübarizə şəraitində keçən oyunların yekununda qaliblər müəyyənləşdirilib. Rayon birinciliyinin yekun nəticələrinə əsasən I yeri İsmayıllı şəhər E.Məmmədov adına 3 saylı məktəb-liseyin komandası, II yeri İvanovka kənd tam orta məktəbin  komandası , III yeri isə Talıstan kənd  tam orta məktəbin komandası tutub.

Qalib komandalar İsmayıllı Rayon Gənclər və İdman İdarəsinin öncədən hazırlanmış diplomları və Təhsil İşçiləri Azad Həmkarlar İttifaqı İsmayıllı rayon komitəsinin qiymətli hədiyyələri ilə mükafatlandırılıblar.

Qeyd edək ki, rayon birinciliyinin qalibi olan E.Məmmədov adına 3 saylı məktəb-liseyin komandası “Şahin” hərbi-idman oyunu üzrə Yevlax rayonunda  keçiriləcək zona mərhələsinə vəsiqə qazanıb.