Daha sürətli inkişafın əsası kollegial məsləhətləşmə ilə qoyulur.

      İsmayıllı Rayon İcra Hakimiyyətinin  rəhbərliyi 2013-cü ilin mart-aprel ayında başlanğıcını götürmüş ənənəyə əsaslanaraq  qarşıdakı 5 ilin  perspektiv inkişaf layihələrini kollegial qaydada müzakirə edir, məsləhətləşmələr aparır.
    Bu məqsədlə  5 yanvar 2014-cü il tarixdə Heydər Əliyev mərkəzində  İsmayıllı rayonunun növbəti 5 ildə sosial-iqtisadi inkişafının  müzakirəsinə həsr olunmuş dəyirmi masa arxasında söhbət keçirilmişdir. Buraya rayondan kənarda yaşayan  elm adamları, tanınmış ziyalılar, hüquq və səhiyyə işçiləri, iş adamları rayonun aparıcı sahələrində çalışan mütəxəssislər, təcrübəli, pensiyada olan müxtəlif sahə rəhbərləri dəvət olunmuşdular.
    Doğma yurdunun təəssübünü çəkən, onun  inkişafı üçün qüvvəsini sərf etmək istəyən  alimlər, hüquqşünaslar, həkimlər, hüquq mühafizə orqanlarında çalışanlar, ali məktəb müəllimləri vətənsevərliklərini öz mütəşəkkil gəlişləri ilə ifadə etdilər.
  Dəyirmi masa arxasında söhbətə rayon İcra Hakimiyyətinin başçısı Mirdaməd Sadıqov giriş nitqi ilə başladı. Qeyd etdi ki,  dəvət olunanlardan maddi nəsə istənilmir. Azərbaycan Respublikasının Prezidenti İlham Əliyev cənabları verdiyi sərəncamlarla rayonun sosial—iqtisadi, aqrar, nəqliyyat, yol problemlərini müvəffəqiyyətlə həll edir. 2013-cü il 14 avqustda cənab Prezidentin İsmayıllıya mübarək səfəri zamanı bütün əhalimiz bir  daha yəqin etdi ki, rayonumuz onun xüsusi qayğısı əhatəsindədir. Bu qayğının nəticəsi olaraq bölgəmiz sürətli inkişafdadır, sosial-iqtisadi yüksəlişdədir. Sizin isə  düşünülmüş məsləhətlərlə, müasir  iqtisadi idarəetmə yollarını göstərməklə, rayonun  çoxsahəli potensiallarını nəzəri və  praktik baxımdan üzə  çıxarmaqla iştirakınıza  ehtiyac  duyulur. İş, biznes qurmaq istəyənlər üçün  İsmayıllıda səmərəli mühit və şərait vardır. Bu sahədə və vaxtsa  mövcud olmuş maneələr tamamilə  aradan  qaldırılmışdır. Sizinlə  birgə işləməkdən  rayonumuz ancaq  xeyir tapa bilər. Elə bu  düşüncə bu gün bizi bir araya gətirib.
   Sonra iqtisad elmlər doktoru, professor, bu yaxınlarda Yaponiyada səfərdə olmuş  Rəsul Balayev inkişafın  bu ölkəyə məxsus təcrübəsindən  istifadə imkanları barədə  danışdı. Apardığı müqayisələr ixtisasından asılı olmayaraq iştirakçıların hamısı tərəfindən  dərindən anlaşıldı.
   Rayon İcra Hakimiyyəti başçısının birinci müavini Rövşən Ağayev beşillik  perspektiv inkişafın  proqnoz layihələri ilə iştirakçıları tanış etdi.
   Hüquq elmləri namizədi, QMİ-nın aparat rəhbəri Simran Həsənov, BDU-nun tədris  işləri üzrə prorektoru İbad İbadov, ADMA-nın dosenti, Arif Əzizov, coğrafiyaşünas alim   Qadir Bayramlı, şair Musa Yaqub, QHT sədri Rasim Şərifli , professor, İnşaat Mühəndisləri Universitetinin  kafedra müdiri Həbib Ocaqov və başqaları çıxış edib, səmərəli təkliflərini verdilər
   İqtisad Universitetinin kafedra  müdiri professor  Alıcan Abbasov  təklif  etdi ki, əslən İsmayıllıdan olub Bakı şəhərində fəaliyyət göstərən elm, təhsil, səhiyyə işçiləri və iş adamları üçün koordinasiya şurası və ya İsmayıllının inkişafına (inkişaf istiqamətlərinə uyğun) ictimai dəstək qrupları yaradılsın.
    Millət vəkilləri  Novruz Aslanov və Ərəstun Cavadov iştirakları və  inkişafa təkanverici  məzmunda  olan çıxışları ilə tədbirə böyük dəyər verdilər. Onlar həm də perspektiv inkişafda  özlərinin necə  iştirak edəcəklərindən danışdılar.
   Qərara alındı ki, bu tip tədbirlər elmi praktik seminar-həmyerlilərin görüşü adlansın. Tədbirin  necə adlanacağı öz  yerində, məzmunu  çox xeyirli və səmərəli oldu. Gələn qonaqlar da yerli məsul işçilər də, mütəxəssislər də  bundan sonra rayonun inkişafı üçün nə edəcəklərini dəqiq müəyyənləşdirdilər.