Velosiped zavodunun tikintisinə baxış keçirildi
İsmayıllı rayonunda Respublika Velosiped Fedarasiyasının vitse-prezidenti Sahib Ələkbərov, Avropa Velosiped Federasiyasının nümayəndəsi Roland Hofer, Bolqarıstan velosiped istehsalı ilə məşğul olan zavodun direktoru Draqomir Ruzov və rayon ictimayətinin nümayəndələrinin iştirakı ilə ölkəmizdə ilk velosiped zavodunun tikintisinə baxış keçirilib. Rayon İcra Hakimiyyətinin başçısı Mirdaməd Sadıqov hazırkı mərhələdə qeyri-neft sənayesinin şaxələndirilməsi məqsədi ilə bir sıra tədbirlərin həyata keçirilməsi, o cümlədən mövcud təbii və iqtisadi resursların təsərrüfat dövriyyəsinə cəlb edilməsi, ənənəvi sənaye sahələri ilə yanaşı, yeni prioritet istehsal sahələrinin, regionlarda sənaye potensialının gücləndirilməsinin zəruri olduğunu bildirib. Respublika Velosiped Fedarasiyasının vitse-prezidenti Sahib Ələkbərov son on ildə Azərbaycan iqtisadiyyatının bütün sahələrində olduğu kimi, sənayenin inkişafında da böyük uğurlar qazanıldığını bildirib. O qeyd edib ki, bu müddət ərzində rəqabət qabiliyyətli müasir sənaye sahələrinin yaradılması, sənayenin infrastruktur təminatının yaxşılaşdırılması sahəsində çoxsaylı layihələr icra edilib, ölkə sənayesi yeni inkişaf mərhələsinə qədəm qoyub.
Zavodun tikintisi ilə tanışlıq zamanı işlərin ahəngdar və standartlara uyğun aparıldığı bildirilib. Zavod istifadəyə verildikdən sonra il ərzində 30 min ədəd idman, uşaq və şəhər tipli velosiped istehsal etmək gücünə malik olacağı qeyd edilib. 5 hektar ərazidə inşa olunan zavodda 95 nəfər işlə təmin olunacaq. Təcürbə toplamaq məqsədilə bir qrup gəncin Bolqarıstan velosiped zavoduna ezam olunacağı nəzərdə tutulur. Bu ilin sonuna kimi zavodun tikintisinin başa çatdırılması planlaşdırılır.