“Miras” ın növbəti layihəsi icra olundu
26-27 avqust 2015-ci il tarixlərində “Miras” Mədəni İrsin Öyrənilməsinə Kömək İctimai Birliyi İsmayıllı rayon ərazisində “Arxeoloji abidələrin inklüziv turizm perspektivləri və əlillərin reabilitasiyasına dəstək” layihəsinə başlamış və yerli turizm obyektlərində olmuşlar. İctimai Birliyin nümayəndələri avqustun 26-sı Diyyalı kəndində və Basqal qəsəbəsində, avqustun 27-si isə İsmayıllı Rayon Tarix-Diyarşunaslıq muzeyində görüşlər keçirmişdir.
Görüşləri keçirməkdə məqsəd fiziki imkanları məhdud şəxslərin tarix və mədəniyyət abidələrinə, arxeoloji qazıntı sahələrinə, muzeylərə, digər mədəni irs obyektlərinə marağını və sosial həyata inteqrasiyasını təmin etmək, onları cəmiyyətin bir parçası kimi ölkəmizdə baş verən bütün hadisələrin fəal iştirakçısına çevirməyə kömək etməkdən ibarət olmuşdur. Layihə çərçivəsində bölgədə fəaliyyət göstərən turizm infrastrukturlarında çalışanlar, əlillər arasında sorğular aparılmışdır.
