“Əsrlərdən gələn sənətimiz” layihəsi çərçivəsində tədbir keçirilmişdir.

Oktyabr ayının 21-də İsmayıllı Peşə Tədris Mərkəzində Azərbaycan Respublikasının Prezidenti yanında Gənclər Fondunun maliyyə dəstəyi ilə “Gənclər Azad Sahibkarlıq Fəaliyyətində” ictimai birliyi “Əsrlərdən gələn sənətimiz” layihəsi çərçivəsində tədbir keçirilib. Mərkəzin direktoru Zaur Muradov birliyin nümayəndələrini və tədbir iştirakçılarını salamlayıb, bu mövzulu tədbirlərin İsmayıllıda keçirilməsini təqdirəlayiq hesab edib.      
Birliyin əməkdaşı Nəcimə Əliyevanın çıxışından məlum olub ki, “Əsrlərdən gələn sənətimiz” layihəsinin təqdim olunmasında məqsəd itirilməkdə olan sənətlərin dirçəldilməsinə, yerli sənətkarlıq bazarının inkişaf etdirilməsinə, bölgələrdə yaşayan gənclərə qayğı, ümumilikdə,  işsizliyin azalmasına və məşğulluğun artırılmasına dəstək olmaqdan ibarətdir.
İctimai birliyin sədri  Kəmalə Məmmədli qeyd edib ki,  layihəmizə 25 sentyabr 2015-ci il tarixindən start verilib və 6  ay müddətində fəaliyyət göstərəcək.
Layihə İsmayıllı, Şəki, Qəbələ rayonlarını, Bakı və Gəncə şəhərlərini əhatə edir. Layihənin icrasında məqsəd sənətkarlıqla məşğul olmaq istəyən gəncləri həvəsləndirmək, onları sənətkarlıq sahələrinin itirilməkdə olan növlərinin bərpasına cəlb etməkdən ibarətdir.
İlk olaraq layihəyə İsmayıllı rayonundan müxtəlif sənət növləri üzrə12 usta və 100 nəfər dinləyicinin hədəf auditoriyasına cəlb olunacağı bildirilib.
Tədbirdə iştirak edən İsmayıllı rayon Gənclər və İdman İdarəsinin rəisi Taleh Salehov bildirib ki, layihə gənclərimizə qədim sənət növlərini öyrənməkdə köməkçi olacaq. Nənə və babalarımızdan qalan mədəni irsin, sənət nümunələrinin qorunması və yeni nümunələrin yaradılması üçün layihə xüsusi əhəmiyyət kəsb edir. Layihə həm də   İsmayıllı rayonunun xarakterik sənət növlərinin inkişaf etməsi baxımından əhəmiyyətlidir.
Tədbirdə aparılan sorğu əsasında iştirakçıların mövzu ilə bağlı rəy və təklifləri öyrənilib.