İsmayıllıda “Şahin” hərbi-idman oyunu üzrə 22 komandanın iştirakı ilə keçirilən rayon birinciliyi başa çatıb
Azərbaycan Respublikasının Gənclər və İdman Nazirliyi, Azərbaycan Respublikasının Müdafiə Nazirliyi, Azərbaycan Respublikasının Elm və Təhsil Nazirliyi, Azərbaycan Respublikasının Fövqəladə Hallar Nazirliyi, Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidmətinin birgə təsdiqlədiyi Əsasnaməyə uyğun olaraq 11 aprel 2023-cü il tarixdə İsmayıllı şəhər Mərkəzi Meydanda açılış və ilk mərhələsi baş tutan, daha sonra İsmayıllı şəhər 3 saylı məktəb-liseydə digər mərhələləri davam etdirilən və gənclərin vətənpərvərlik tərbiyəsində müstəsna əhəmiyyəti olan “Şahin” hərbi-idman oyunu üzrə 22 komandanın iştirakı ilə keçirilən rayon birinciliyi başa çatıb.
Keçirilən yarışda rayonun tam orta ümumtəhsil məktəblərinin komandaları qələbə uğrunda mübarizə aparıblar.
Tədbirdə İsmayıllı Rayon İcra Hakimiyyətinin məsul şəxsləri, YAP İsmayıllı rayon təşkilatının, hüquq-mühafizə orqanlarının, idarə, müəssisə və təşkilat rəhbərləri, şəhid ailələri, Vətən müharibəsi iştirakçıları və gənclər iştirak edib.
"Şahin” hərbi-idman oyunlarının keçirilməsində əsas məqsəd böyüməkdə olan gənc nəslin hərbi-vətənpərvərlik tərbiyəsinə diqqəti daha da artırmaq, məktəbliləri hərbi-idman oyunlarına geniş cəlb etməklə onların ordu sıralarında xidmətə hazırlanmasına kömək göstərilməkdən ibarətdir.
İlk öncə Azərbaycan Respublikasının Dövlət Himni səsləndirilib. Daha sonra Vətənin azadlığı və ərazi bütövlüyü uğrunda həlak olmuş şəhidlərin ruhu bir dəqiqəlik sükutla yad edilib.
Olduqca maraqlı və gərgin mübarizə şəraitində keçən oyunların yekununda qaliblər müəyyənləşdirilib. Rayon birinciliyinin yekun nəticələrinə əsasən I yeri Diyallı kənd tam orta məktəbin komandası, II yeri Talıstan kənd tam orta məktəbin komandası, III yeri isə İsmayıllı şəhər 2 saylı tam orta məktəbin komandası tutub.
“Şahin” hərbi-idman oyununun qalibi olan komandalar İsmayıllı rayon Gənclər və İdman İdarəsi tərəfindən diplom və medallarla təltif olunacaqlar.
Qeyd edək ki, rayon birinciliyinin qalibi olan Diyallı kənd tam orta məktəbin komandası, “Şahin” hərbi-idman oyunu üzrə Göyçay rayonunda keçiriləcək zona mərhələsinə vəsiqə qazanıb.
