İsmayıllıda 26 İyun-Silahlı Qüvvələr Günü qeyd olunub
Bu gün İsmayıllı Rayon İcra Hakimiyyətinin təşkilatçılığı ilə 26 İyun-Silahlı Qüvvələr Gününə həsr edilmiş “Heydər Əliyev və Azərbaycanda Ordu Quruculuğu” mövzusunda tədbir keçirilib.
Tədbirdə İsmayıllı Rayon İcra Hakimiyyətinin başçısı Nahid Bağırov, İsmayıllı Səfərbərlik və Hərbi Xidmətə Çağırış üzrə Dövlət Xidmətinin rəisi Əfran Nəbiyev, YAP İsmayıllı Rayon Təşkilatının sədri Zaur Muradov, İsmayıllı rayon Gənclər və İdman İdarəsinin rəisi Taleh Salehov, Vətən müharibəsi qəhrəmanı ehtiyatda olan polkovnik-leytenant Anar Mirzəyev, şəhid ailələri, müharibə iştirakçıları, qazilər, məktəblərin hərbi rəhbərləri və “Şahin” hərbi-idman oyunları üzrə Respublika birincisi olmuş İsmayıllı komandası iştirak edib.
Tədbir iştirakçıları Ulu Öndər Heydər Əliyevin abidəsini ziyarət edib, dahi rəhbərin xatirəsini ehtiramla yad ediblər. Tədbirdə Dövlət Himni səsləndirilib, Ümummilli Lider Heydər Əliyevin və torpaqlarımızın azadlığı uğrunda şəhid olmuş vətən oğullarının xatirəsi bir dəqiqəlik sükutla yad edilib.
Daha sonra Azərbaycan Silahlı Qüvvələrinin yaranma tarixindən, keçdiyi inkişaf və döyüş yolundan, nizami ordu quruculuğundan bəhs edən filmə baxılıb. Polkovnik-leytenant Elçin Hətəmov “Heydər Əliyev və Azərbaycanda Ordu Quruculuğu” mövzusunda məruzə ilə çıxış edib.
Tədbirdə iştirak edən Qarabağ müharibəsi qəhrəmanı, ehtiyatda olan polkovnik-leytenant Anar Mirzəyev Respublika birincisi olmuş komanda üzvlərini qələbə münasibətilə təbrik edərək Azərbaycan Silahlı Qüvvələrinin şərəfli tarixinin xalqımızın ümummilli lideri Heydər Əliyevin adı ilə bağlı olduğunu, müasir Azərbaycan Ordusunun qurulması, inkişafı və möhkəmlənməsinin Heydər Əliyevin yorulmaz fəaliyyətinin, dövlətçilik təfəkkürünün, siyasi uzaqgörənliyinin məntiqi nəticəsi olduğunu qeyd edib.
Polkovnik-leytenant Anar Mirzəyev Qarabağ müharibəsində Azərbaycan Ordusunun göstərdiyi şücaətdən də danışıb. İsmayıllı komandasının hərbi rəhbəri Altay Pənahov komandanın yarışlarda göstərdiyi əzm və iradəsindən danışaraq onlara göstərilən diqqət və qayğıya görə rayon rəhbərliyinə minnətdarlığını bildirib.
RİH başçısı Nahid Bağırov “Şahin” hərbi-idman oyunları üzrə Respublika birincisi olmuş İsmayıllı komandasının şahinlərini və müəllim heyyətini qələbə münasibətilə təbrik edərək onlara mükafatları təqdim edib.
