İsmayıllıda Uşu üzrə “Dəmir Yumruq” İsmayıllı açıq rayon birinciliyi keçirilib

Bu gün İsmayıllı rayon Gənclər və İdman İdarəsinin və Azərbaycan Uşu Federasiyasının birgə təşkilatçılığı ilə İsmayıllı Olimpiya İdman Kompleksində Uşu üzrə “Dəmir Yumruq” İsmayıllı açıq rayon birinciliyi keçirilib.

Birincilik Azərbaycan Respublikasının Dövlət Himninin səsləndirilməsi, Azərbaycanın ərazi bütövlüyü və müstəqilliyi uğrunda canlarını fəda etmiş Vətən oğullarının xatirəsinin bir dəqiqəlik sükutla yad edilməsi ilə başlayıb.

Tədbirdə RİH-nin məsul əməkdaşı, İsmayıllı rayon Gənclər və İdman idarəsinin rəisi və əməkdaşları, Uşu federasiyasının təşkilati komitəsinin sədri, İsmayıllı Olimpiya İdman Kompleksinin direktoru, şəhid ailələri və idmançılar iştirak ediblər.

Vətən müharibəsi şəhidlərinin xatirəsinin yad edilməsi, gənc və yeniyetmələrdə vətənpərvərlik hisslərinin gücləndirilməsi, idmançıların təcrübələrinin artırılması məqsədi daşıyan turniri açıq elan edən İsmayıllı rayon Gənclər və İdman İdarəsinin rəisi Taleh Salehov çıxış edərək iştirakçılara uğurlar arzulayıb və Vətən müharibəsi şəhidlərinin xatirəsinə həsr olunmuş tədbirlərin zəruriliyi, həmçinin mahiyyəti və əhəmiyyəti barədə məlumatlarını tədbir iştirakçıları ilə bölüşüb və idmanın əyani olaraq daha sürətlə inkişafı üçün vacib arqumentləri iştirakçıların diqqətinə çatdırıb.

Müxtəlif yaş qrupları və çəki dərəcələri üzrə müəyyən olunmuş turnir Beynəlxalq Uşu Federasiyasının qaydalarına əsasən həyata keçirilib.

Turnirdə I,II, və III yerləri tutmuş idmançılar təşkilatçılar tərəfindən diplom və medallarla təltif olunacaqlar.