“Möhkəm ailə münasibətlərinin əsası: gender bərabərliyi və qarşılıqlı hörmət” mövzusunda tədbir keçirilib
İsmayıllı Dövlət Humanitar və Texnologiya Kollecində Dini Qurumlarla İş üzrə Dövlət Komitəsinin (DQİDK) Dağlıq Şirvan regional bölməsi və İsmayıllı Rayon İcra Hakimiyyətinin (RİH) birgə təşkilatçılığı ilə “Möhkəm ailə münasibətlərinin əsası: gender bərabərliyi və qarşılıqlı hörmət” mövzusunda tədbir keçirilib.
Tədbirdə DQİDK-nın Dağlıq Şirvan regional bölməsinin əməkdaşı Aydın Səmədov, İsmayıllı RİH-nin əməkdaşı Bəhruz Xələfov, şəhid Fərid Əliyevin valideyni Hamlet Əliyev, İsmayıllı şəhəri "Məhəmmədiyyə" məscidinin imamı Faiq Soltanov, İsmayıllı Dövlət Humanitar və Texnologiya Kollecinin əməkdaşı Elşən Həsənov, eləcə də kollecin tələbələri iştirak ediblər.
Çıxışlar zamanı Azərbaycanda ailə dəyərləri, ailə institutunun formalaşması və qorunub saxlanılmasında milli-mənəvi dəyərlərin əhəmiyyəti barədə danışılıb. Bildirilib ki, xalqımızın dəyərlər sistemində ailə münasibətləri mühüm yer tutur. Tarixən ailənin xalqımızın yüksək mənəvi dəyərlərinin qoruyucusu, genofondumuzun daşıyıcısı kimi milli inkişafımızda mühüm rol oynadığı qeyd edilib. Həmçinin gənclərin şəxsiyyət kimi formalaşması və sağlam cəmiyyətin qurulmasında ailə dəyərlərinin əhəmiyyəti vurğulanıb.
