Ümummilli lider Heydər Əliyevin 100 illiyinə həsr edilmiş “Tarix Yazan Əbədiyaşar Lider” mövzusunda tədbir keçirilib

Bu gün Heydər Əliyev adına Mərkəzdə Ulu Öndər Heydər Əliyevin 100 illiyinə həsr olunmuş “Tarix Yazan Əbədiyaşar Lider” mövzusunda tədbir keçirilib. Tədbirdə İsmayıllı Rayon İcra Hakimiyyətinin başçısı Nahid Bağırov, RİH-nin məsul əməkdaşları, müəssisə, təşkilat rəhbərləri, şəhid ailələri, əməkdar müəllimlər və rayon ziyalıları iştirak edib.

Əvvəlcə Ümummilli Lider Heydər Əliyevin abidəsi gül dəstələri ilə ziyarət olunub. Daha sonra rəsmilər Ulu Öndər Heydər Əliyevə həsr olunmuş foto və rəsmlərdən ibarət sərgiylə yaxın tanış olublar.

Ümummilli Lider Heydər Əliyevin və ölkəmizin ərazi bütövlüyü naminə canından keçən şəhidlərimizin əziz xatirələri bir dəqiqəlik sükutla yad edilib.

Tədbirdə Dağlıq Şirvan Gənclər və İdman İdarəsinin rəisi Taleh Salehov məruzə ilə çıxış edib. O bildirib ki, 34 ildən artıq bir dövrü əhatə edən zəngin siyasi fəaliyyəti ilə Azərbaycan dövlətinin tarixində müstəsna rol oynayan Ulu Öndərin adı xalqımızın tarixinə dövlətimizin xilaskarı, memarı və qurucusu kimi həkk edilib. Azərbaycanın son onilliklər ərzində qazandığı bütün uğurlarda Heydər Əliyevin imzasının olduğunu, ona görə də Ulu öndərin Vətən və millət qarşısında misilsiz tarixi xidmətlərinin minnətdarlıq hissi ilə xatırlandığını diqqətə çatdırıb.

Müasir Azərbaycan dövlətinin memarı, ümummilli lider Heydər Əliyevin müstəqilliyimizin qorunub möhkəmləndirilməsində, demokratik hüquqi dövlət quruculuğunun inkişafındakı müstəsna rolu və misilsiz xidmətləri qədirbilən xalqımız tərəfindən daim uca tutulur, əziz xatirəsi dərin ehtiramla anılır. Müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir.

Tədbirdə digər çıxış edənlər “Heydər Əliyev ili” çərçivəsində keçirilən tədbirlərin əhəmiyyətindən danışıblar. Qeyd olunub ki, Ulu Öndərin mənalı ömür yolunun hər anı, hər səhifəsi bugünkü və gələcək nəsillərə nümunədir və unudulmaz tarixdir.