Yeni Azərbaycan Partiyasının təsis edilməsinin 30 illiyi ilə əlaqədar zona üzrə şahmat yarışı keçirilib
Yeni Azərbaycan Partiyasının təsis edilməsinin 30 illiyi ilə əlaqədar Zaqatala, Balakən, Qax, Şəki, Qəbələ, Oğuz, İsmayıllı, Şamaxı gəncləri arasında şahmat üzrə qrup oyunları keçirilib.
İsmayıllı rayon Heydər Əliyev Mərkəzində təşkil olunan yarışın məqsədi YAP üzvü və bitərəf gənclər arasında şəbəkələşmənin dərinləşdirilməsi, gənclərin intellektual inkişafının təşviqi, gənclər arasında şahmat idman oyununun təbliği və kütləviləşdirilməsidir.
Əvvəlcə RİH başçısının müavini, Zaqatala, Balakən, Qax, Şəki, Qəbələ, Oğuz, İsmayıllı, Şamaxı rayonlarının YAP təşkilatlarının sədri Ulu Öndər Heydər Əliyevin abidəsini ziyarət edib, xatirəsini ehtiramla yad ediblər.
Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Ulu öndər Heydər Əliyevin və Azərbaycanın müstəqilliyi, suverenliyi, ərazi bütövlüyü uğrunda şəhid olmuş qəhrəmanlarımızın əziz xatirəsi bir dəqiqəlik sükutla yad edilib.
Tədbiri giriş sözü ilə YAP İsmayıllı rayon təşkilatının sədri Zaur Muradov açaraq qonaqları salamlayıb, xalqımızın Ümummilli Lideri Heydər Əliyevin qurucusu olduğu Yeni Azərbaycan Partiyasının 30 il ərzində şərəfli yol keçdiyini, ümumxalq partiyasına çevrildiyini diqqətə çatdırıb. Z.Muradov YAP-ın qələbələr partiyası kimi Azərbaycana tarixi nailiyyətlər qazandırdığını diqqətə çatdırıb.
Tədbirdə iştirak edən İsmayıllı Rayon İcra Hakimiyyəti başçısının müavini Sevil Əhmədova çıxış edərək qeyd edib ki, Ulu Öndərimiz Heydər Əliyevin yaratdığı Yeni Azərbaycan Partiyası xalqımızın və ölkəmizin həyatına fundamental dəyişikliklər gətirməklə yanaşı, siyasi mübarizələrlə dolu çətin və şərəfli bir yol keçib. Yeni Azərbaycan Partiyası Heydər Əliyev siyasətinin aparıcı qüvvəsi kimi, xalqımızın qarşısında dayanan vəzifələrin həll edilməsinə layiqli töhfəsini verib və bundan sonra da verəcək. O, Heydər Əliyev ideyalarının əbədiyaşar olduğunu, ölkəmizin Prezident İlham Əliyevin rəhbərliyi ilə uğurla inkişaf etdiyini söyləyib, bütün idmançılara uğurlar arzulayıb.
Daha sonra turnirə start verilib. Yarış sonunda qalib olmuş şahmatçılar növbəti mərhələyə vəsiqə qazanacaqlar.
