15 fevral 2016-cı il tarixdə əhalinin tibbi müayinədən keçirilməsinə start veriləcək

Azərbaycan Respublikasının Prezidenti cənab  İlham Əliyevin tapşırığına əsasən fevralın 15-dən mayın 2-dək respublika əhalisinin tibbi müayinədən keçirilməsi nəzərdə tutulub.
Bununla əlaqədar rayonumuzda da mühüm tədbirlər həyata keçirilir. Bu məsələ ilə bağlı tapşırıqların icrasını təmin etmək və tibbi müayinənin keyfiyyətlə həyata keçirilməsinə nail olmaq məqsədilə Rayon İcra Hakimiyyətinin başçısı Mirdaməd Sadıqov sərəncam imzalamışdır. Sərəncama əsasən rayon əhalisinin tibbi müayinədən keçirilməsini təşkil etmək üçün komissiya, işçi qrupu yaradılmış, kollektivlər və ərazilər nəzərə alınmaqla xüsusi qrafik hazırlanmışdır. Sərəncamdan  irəli gələn məsələlərin icrası ilə əlaqədar 11 fevral 2016-cı il tarixdə aidiyyəti qurum və şəxslərin iştirakı ilə Rayon Mərkəzi Xəstəxanasında RİH-nin başçısı  Mirdaməd Sadıqov müşavirə keçirmişdir.  Müşavirədə tibbi müayinənin keyfiyyətlə həyata  keçirilməsi istiqamətində zəruri tədbirlərin təşkili üçün Rayon Mərkəzi Xəstəxanasına tapşırıqlar  verilmiş,  həmçinin  Rayon  İcra Hakimiyyəti başçısının şəhər,  qəsəbə, kənd inzibati ərazi dairələri üzrə nümayəndələrinə,  idarə və təşkilat rəhbərlərinə tədbirin yüksək səviyyədə  təşkili  üçün əhali arasında  geniş  təşkilati  izahat  işləri aparmaq tapşırılmışdır.